Geniet

KOS VIR DIE SIEL

Hier kan jy ons preke op jou tyd deurwerk.

KYK ONS PREKE

Ons almal ken daardie oomblik… Daardie oomblik wanneer jy harder praat as wat jy bedoel het. Wanneer jy skielik kort van draad is. Wanneer iets kleins ’n heftige reaksie in jou losmaak. Wanneer jy later terugkyk en vir jouself vra: “Hoekom het ek so af gegaan?” Maar wat as jou reaksie nie die regte probleem is nie? Wat as dit net die plek is waar iets dieper na die oppervlak kom? Hierdie Sondag kyk ons na die verhaal van Naäman in 2 Konings 5 ’n man met posisie, mag, status en sukses, maar onder sy “harnas” was daar ’n seer wat niemand kon sien nie. - Naäman het soos ’n oorwinnaar gelyk, maar hy het genesing nodig gehad. - Hy het gesag gehad, maar daar was ’n plek in hom wat gebreek was. - Hy kon bevele gee, maar hy moes leer om homself aan God se proses oor te gee. Dikwels dra ons ook ons eie harnas: perfeksie, beheer, trots, besigheid, ’n glimlag, ’n titel, ’n sterk voorkoms, terwyl daar diep binne-in iets is wat nog nie heeltemal genees is nie. Hierdie boodskap is vir elkeen wat al ooit gevoel het: “Ek weet nie hoekom ek so gereageer het nie.” “Ek weet nie hoekom dit my so diep geraak het nie.” “Ek weet nie hoekom ek nog steeds hiermee sukkel nie.” Miskien wil God nie net jou gedrag verander nie. Miskien wil Hy die wond aanraak wat jou gedrag dryf. Kom ontdek saam met ons hoe God nie net die gedrag herstel nie, maar die binnekant reinig. Want ware genesing begin wanneer ons ophou voorgee en begin oorgee. Hoekom het ek so af gegaan? Die storie van Naäman | 2 Konings 5 09H30 | Son 24 Mei 2026 Kompas Familie Gemeente Kom soos jy is.
Hoekom het ek so afgegaan?
Men with Resilience - Manne Byeeenkoms 19 Mei 2026 Vredendal Pastor Jan-Hendrik Kleynhans | Kompas Familie Gemeente
Here hoe hanteer ek dit?
Dit is nie soos ek gedink het nie… Jaïrus het gedink sy posisie beteken iets, totdat sy dogtertjie besig was om te sterf. Die vrou het begin glo dat haar identiteit vasgevang is in haar toestand, dat sy niks meer is as haar bloeding, haar skaamte en haar stil lyding nie. Vir twaalf jaar lank het sy moontlik voor mense geglimlag, normaal voorgekom en aangegaan asof alles reg is, maar diep binne-in het sy gebloei op plekke wat niemand kon sien nie, met ’n pyn wat sy alleen moes dra. En toe kom Jesus. Hy loop nie verby haar pyn nie. Hy ignoreer nie Jaïrus se trane nie. Hy word nie afgeskrik deur wat ander klaar “dood” verklaar het nie. Die mense sê: “Dis verby.” Jesus sê: “Moenie vrees nie; glo net.”
Ek is nie wat ek dink nie. Markus 5: 21-43
Daar is oomblikke in die lewe waar ons só vasgevang raak in ons probleme dat ons nie meer die moontlikhede raaksien nie. Ons sien net die druk, die uitdagings, die tekort, die frustrasie en die dinge wat nie uitwerk soos ons gehoop het nie. Maar in Johannes 4:35 kom Jesus en Hy verander die manier hoe ons kyk. Hy sê in effek: “Moenie net kyk na wat nog nie gereed lyk nie; kyk weer, die oes is reeds daar.” Wat as dit wat jy vandag as ’n probleem sien, eintlik ’n plek van potensiaal is? Wat as die uitdaging wat jou moeg maak, die einste landery is waar God besig is om iets gereed te maak? Ons vra dikwels: “Hoe lank nog, Here?” Maar Jesus sê: “Lig jou oë op. Kyk weer.” Want soms is die grootste probleem nie die landery nie — dit is ons perspektief. Miskien is die oes nie weg nie. Miskien is dit net versteek agter jou vrees, jou moegheid, jou teleurstelling en jou eie verwagting van hoe God moet werk. Vandag roep Jesus ons om nie net na die uitdaging te kyk nie, maar om met geestelike oë te sien: waar jy druk sien, sien God ’n deur; waar jy weerstand sien, sien God ’n roeping; waar jy ’n probleem sien, sien God ’n oes.
Uitdagings met die oes -Johannes 4-
Standfontein Gemeente Kamp
Kompas Familie Gemeente | Strandfontein 2026
Daar is tye wat ons bid omdat ons glo…en daar is tye wat ons bid omdat ons nie meer weet wat anders om te doen nie. In Handelinge 12 was die kerk só besig om vir Petrus te bid, dat hulle amper nie kon glo toe Petrus self by die deur staan nie. Die antwoord op hulle gebed was nie ver weg nie. Dit was nie eers “eendag” nie. Dit was daar, besig om te klop. En dalk is dit presies waar baie van ons is.Ons bid vir uitkoms, maar ons is moeg.Ons vra vir ’n deur, maar ons hart is bang om weer te hoop.Ons glo God kan, maar ons sukkel om te glo Hy sal. Môre wil ons saam kom sit by die Woord en weer hoor: God vergeet nie Sy kinders nie. Hy hoor die gebed wat jy fluister wanneer niemand anders weet wat in jou hart aangaan nie.
Kyk Wie Klop - Sondag 26 April 2026
Kom uit jou tent! Jy kan nie sien wat God jou wil wys, terwyl jy vasgevang bly in jou eie omstandighede nie. Daar is meer as wat jy om jou sien. Daarom het God vir Abram na buite geneem, sodat hy nie net na sy huidige situasie kyk nie, maar na die groter belofte van God. Môre se boodskap: Kom uit jou tent! (Genesis 15:5)
Kom uit jou tent
Wat as die deurmekaarste deel van jou lewe die presiese plek is waar God besluit het om jou te vind? Obed-Edom het nie die ark gaan soek nie; die teenwoordigheid van God het by sy huis opgedaag, in ’n ongemaklike en onverwagse oomblik. Dit is wat genade doen. God wag nie dat jy eers alles moet regkry, jouself moet regmaak of jou lewe mooi moet uitwerk nie. Hy kom na jou toe, in jou gewone, stukkende en onvolmaakte werklikheid. En skielik word die plek van vrees die plek van seën, die plek van skaamte die plek van aanraking, en die plek wat jy wou wegsteek word die plek waar God sê: “Ek het jou nie vergeet nie… Ek het jou gevind.” Kom kuier môre saam met ons by die kerk. Dalk is hierdie die plek waar God jou wil ontmoet, jou hart wil aanraak en jou weer wil herinner dat jy nie alleen is nie.
God het my gevind
Dit wat Hy gedoen het, is groter as wat Jy gedoen het!
Subscribe